د خوست ولایت اړوند قلندر ولسوالۍ ګڼ شمېر اوسېدونکو نن شنبې ورځ د چنګاښ په ۲۶مه د یوې غونډې په ترڅ کې وویل؛ جمهوریت د ولس غوښتنه ده او د خپلو ملي امنیتي او دفاعي ځواکونو سره په ګډه به د جمهوریت او د خاورې څخه دفاع کوي.
دوی زیاته کړه، چې د خپلې ولسوالۍ او خپلې خاورې څخه د خپلو اتلو ځواکونو سره یوځای ساتنه کوو او هېڅ چا ته اجازه نه ورکوو، چې زمونږ په سیمه کې عامه تاسیسات ویجاړ، د خلکو ژوند ودروي، د پرمختګ او انکشاف مخنیوی وکړي.
خوست والي تورن جنرال مهمند کټوازي چې په یاده غونډه کې ګډون کړی ؤ، د منګلو قوم مشرانو، ځوانانو او علماو ته یې ډاډ ورکړ او ويې ویل؛ ټول ملکي او نظامي رهبري ښه همغږي لري، دښمن ته به هېڅ اجازه ورنکړو، چې د خوست ارامه فضا ګډوډه کړي او خوست به د خپلو خوستیو ولسونو پر مټ همداسې ارامه ساتو.
له دې وړاندې هم د خوست ولایت په مرکز او یوشمېر ولسوالیو کې ولسونو دې ته ورته لاریونونه او غونډې کړې وې.