۸صبح، کابل: تهران کې د ایران له ولسمشر ابراهیم رییسي سره د تاجیکستان د ولسمشر امام علي رحمن په لیدنه کې، په افغانستان کې د ټولګډونه حکومت پر رامنځته کېدو ټینګار شوی دی.
د ایران د بهرنیو چارو وزیر امیر عبداللهیان په دې اړه ویلي، چې د دواړو هېوادونو ولسمشرانو په افغانستان کې د ناورین په اړه خبرې اترې کړې او دواړه لوري د افغانستان په اړه یوشان لیدلوری لري.
هغه زیاته کړې: «موږ او تاجیکستان په افغانستان کې د ټولو توکمونو په ګډون کولو سره د ټولشموله حکومت پر جوړېدو ټینګار کوو.»
ایراني رسنیو د دغه هېواد د بهرنیو چارو وزیر له قوله زیاته کړې: «په افغانستان کې ځینو بدلونونو، خوځښتونو او د ترهګریزو اقدامونو پراختیا ته اندېښمن یو.» د ویلو ده، چې د تاجیکستان ولسمشر امام علي رحمن یکشنبه د مې پر ۲۹، د دغه هېواد د یوه جګپوړي پلاوي په مشرۍ تهران ته سفر کړی. نن د دواړو هېوادونو پلاوو د ابراهیم رییسي او امام علي رحمن په شتون کې په بېلابېلو برخو کې د همکارۍ ۱۷ هوکړه لیکونه لاسلیک کړل.
