8صبح، کابل: د طالبانو له یو شمېر چارواکو سره د اسلامي همکاریو سازمان(OIC) د پلاوي له لیدنې وروسته، دغه سازمان وايي چې زده کړه د ښځو او نارینه و لپاره دنده ده.
د اسلامي همکاریو سازمان د چهارشنبې په شپه د وږي په ۱۵ نېټه، په یوې اعلامیه کې ویلي چې ددغه سازمان پلاوي په تېرو څو ورځو کې د طالبانو د ډلې د پوهنې له وزیر مولوي حبیب الله آغا او د لوړو زده کړو له وزیر مولوي ندامحمد ندیم، سره په افغانستان کې د نجونو د زده کړو په اړه خبرې اترې کړي دي.
ددغه سازمان په اعلامیه کې راغلي دي: « په دغو لیدنو کې، دواړو خواوو ټینګار وکړ چې زده کړه د ټولو عالمانو په اجماع سره د ښځې او نارینه لپاره یو اسلامي واجب دی.»
د اعلامیې پر بنسټ، طالبانو د اسلامي همکاریو سازمان پلاوي ته وویل چې د هغوی رژیم د نجونو لپاره د خوندي فضا او درسي نصاب د برابرولو په لټه کې دی.
په دغه اعلامیه کې همداراز راغلي دي: « پلاوي د تاریخ په دې حساس پړاو کې په ټولو برخو کې د هلکانو او نجونو د وړتیا لوړونې لپاره د هڅو غوښتونکی دی.»
په همدې حال کې، د افغانستان په چارو کې د اسلامي همکاریو د سازمان د منشي استازي طارق علي بخیت، چهارشنبه د وږي په 15مه، د طالبانو د بهرنیو چارو له وزیر مولوي امیرخان متقي سره په کابل کې لیدلي دي.
د اطلاعاتو پر بنسټ هغوی افغانستان ته د اسلامي همکاریو د سازمان د عالمانو د پلاوي د سفر د پایلې، په اسلام کې مدارا، د نجونو د زده کړو او کار په اړه خبرې اترې کړي دي.
پر افغانستان د طالبانو له بیاځلي واکمني وروسته، دغې ډلې لومړی له شپږم ټولګي پورته نجونې له ښوونځي منع او وروسته یې د هغوی پر مخ د پوهنتونونو دروازې وتړلې.
له طالبانو نه د افغان نجونو پرمخ د ښوونځیو او پوهنتونونو د پرانېستل کېدو په اړه د نړیوالو بنسټونو د پرلپسې غوښتنو سره سره، طالبانو د نړیوالو دغه غوښتنه نده منلې.
