۸صبح، کابل: د طالبانو د سرحدونو، قومونو او قبایلو چارو وزارت مسوولان ادعا کوي چې پر افغانستان د دغې ډلې واک ته له رسېدو وروسته، د هېواد د قومونو ترمنځ شخړې کمې شوې دي.
دوی یکشنبه د وږي پر ۱۸مه د طالبانو د حساب ورکونې په پروګرام کې ویلي چې دغه وزارت په تېر کال کې د هېواد په بېلابېلو برخو کې د قومونو ترمنځ د شخړو د هوارۍ په موخه ۳۰۴ غونډې او ۵۲۵ ناستې کړې دي.
د طالبانو د سرحدونو، قومونو او قبايلو چارو وزارت د ادعا پر بنسټ، دغه وزارت د قومونو او خلکو ترمنځ شخړې، لانجې او دښمنۍ په قطعي ډول حل کړي دي.
د هرات په رباط سنګي ولسوالۍ کې د اڅکزو، طاهري او نورو قومونو ترمنځ د ۵۰ کلنې شخړې، د بادغیس په ابکمري ولسوالۍ کې ۲۰ کلنې شخړې، په غزني کې د هزاره او کوچیانو ترمنځ ۲۴ کلنې شخړې او د پنجشېر په قصبه ولسوالۍ کې د ۴۰ کلنې شخړې حل د دغه وزارت مهمې لاسته راوړنې بلل کېږي.
د طالبانو د معلوماتو پر بنسټ، د دغې ډلې د رئیسالوزرا د حکم له مخې په بادغیس، فاریاب، جوزجان، بلخ، تخار، بغلان، بدخشان، ننګرهار، کندهار، هلمند، پکتیکا، ارزګان، بامیان، کونړ او میدان وردګ ولایتونو کې د کوچیانو له زیانمنو کورنیو سره نغدي او نورې مرستې شوې دي.
د دې تر څنګ د کوچيانو د درملنې لپاره ۱۰۰ ګرځنده او ۱۱ ثابت کلينيکونه او د څارويو د درملنې لپاره ۶۰ کلينيکونه د طالبانو له خوا جوړ شوي دي.
دا څرګندونې په داسې حال کې کېږي چې د هېواد په بېلابېلو سيمو کې له تېرو درېيو کلونو راهيسې د طالبانو له خوا د خلکو د غچاخیستنې او د هغوى د جبري کډوالۍ لړۍ دوام لري.
څو ورځې مخکې د غور لپاره د طالبانو والي د سرحدونو او قبایلو له وزیر سره په همغږۍ د دغه ولایت په دولتیار ولسوالۍ کې شاوخوا ۶۰۰ کورنیو د وتلو امر کړی و.
دغه راز تېره اوونۍ د غزني سیمهییزو سرچینو ۸صبح ورځپاڼې ته ویلي و چې طالبانو په دغه ولایت کې د ناور ولسوالۍ لسګونه کورنۍ ته د جبري وتلو امر کړی دی.
د سرچينې د معلوماتو پر بنسټ، طالبانو په یوې «ناعادلانه» پرېکړه کې د واغ، سر دريا او برکي ناور کليو اوسېدونکو لسګونه جريبه کرنيزه ځمکه او څړځايونه کوچيانو ته سپارلي دي.
