۸صبح، غزني:غزني ولایت کې ځایي سرچینې وایي، چې د دغه ولایت په ناور ولسوالۍ کې کوچیان یو ځل بیا د دغه ځای پر اسېدونکو عرض کړی او ادعا یې کړې، چې ۱۰ کاله مخکې د دغې ولسوالۍ د هوکک سیمې اوسیدونکو د هغوی دوې خیمې «چور» کړې دي.
سرچینې دوشنبه د وږي پر ۷ وایي، کوچیانو اعتراض کړی چې له دغو دوو خیمو یو تراکتور او سره زر غلا شوی او د دغې سیمې اسېدونکي یې باید اوس تاوان ورکړي.
د سرچینو په وینا په دغې ولسوالۍ کې د طالبانو امنیه قوماندان د سیمې د خلکو د خبرو له اورېدو پرته د کوچیانو په ګټه فیصله وکړه، چې باید دهوکک سیمې اوسېدونکي کوچیانو ته یو میلیون افغانۍ تاوان ورکړي.
د سیمې اوسېدونکي دغه پرېکړه ښکاره ظلم بولي او ټینګار لري، چې د خیمو د غلا کېدو له کیسې هېڅ خبر نه دي او قضیه د سیمې له اوسېدونکو سره هېڅ تړاو نه لري.
د ویلو ده، چې تېر یوه کال کې دا لومړی ځل نه دی، چې طالبان د کوچیانو د ادعا او د هغوی د پرېکړې له مخې د ناور اوسېدونکی د میلیوني ګرمو ورکولو ته اړ شوي دي.
دا په داسې حال کې ده، چې تېره اوونۍ کې هم طالبانو په دې ولسوالۍ کې د کوچیانو د ادعا پربنسټ پرېکړه وکړه، چې د یوې کوچۍ ښځې د وینې بیه چې ۱۸ کاله مخکې د مخکیني حکومت له امنیتي ځواکونو سره په نښتو کې وژل شوې وه باید ۱۰ میلیون افغانۍ ورکړل شي.
