۸صبح، کابل: سیمهییزې سرچینې وايي، طالب جنګیالیو په کابل ښار کې یو «کافي شاپ او کتابتون» چې د څلورو نجونو له خوا جوړ شوی، د پرانیستې مراسمو ته اجازه نه ده ورکړې.
سرچینې ۸صبح ورځپاڼې ته منلې چې ټاکل شوې وه د «رویای زن کافي شاپ او کتابتون» چهارشنبه د غبرګولي پر ۹مه د کابل ښار د ۱۱مې ناحیې اړوند د خیرخانې په سیمه کې پرانیستل شي او فعالیت پیل کړي.
سرچینه زیاتوي چې طالبانو له اړوندې حوزې څخه د اجازې نه لرلو په پلمه د دغه کافي شاپ او کتابتون د فعالیت مخنیوی کړی دی.
د سرچينې په خبره، يو شمېر مېرمنې د دې پروګرام د پرانيستې په حال کې وو چې دوه طالبان له وسلو سره ننوتي او پروګرام يې بند کړی دی.
سرچینه زیاتوي چې دې نجونو دوه ورځې دمخه له ۱۱مې حوزې څخه د دې پروګرام د پرانیستې اجازه ترلاسه کړې وه؛ خو طالب جنګیالیو نجونو ته خبرداری ورکړ چې بېرته دې حوزې ته لاړې شي او اجازه دې واخلي.
څلورو نجونو د څه باندې ۱۰ زره افغانیو په لګښت دا کافي شاپ جوړ کړی او د دې ځای د جوړېدو موخه یې ښځو ته د خوندي تفریح ځای برابرول بللي دي.
که څه هم طالبانو تل ادعا کړې چې په خصوصي سکټور کې د ښځو کار لا هم په خپل ځای دی؛ خو د ښځو کار پر وړاندې د دغې ډلې کړنې تل برعکس دي.
