۸صبح، کابل: د افغانستان لپاره د ملګرو ملتونو د سرمنشي ځانګړې استازې او د یوناما مشرې روزا اوتونبایوا د طالبانو د بهرنیو چارو وزیر امیر خان متقي سره په یوې لیدنه کې ویلي چې افغانستان ته پراختیایي مرستې د بشري مرستو په پرتله ډېرې شوې دي.
د طالبانو د بهرنیو چارو وزارت چهارشنبه د سلواغې پر ۳مه، په یو بیان کې زیاته کړې چې دواړو خواوو په دې لیدنه کې د بشري مرستو او د هېواد د اقتصادي ودې په تړاو خبرې کړې دي.
طالبانو ادعا کړې چې اوتونبایوا ویلي، په افغانستان کې مثبت بدلونونه راغلي او نوموړې به د ملګرو ملتونو په ناستو کې د دغې ډلې د پرمختګ یادونه وکړي.
ورته مهال، امیر خان متقي زیاته کړې چې افغانستان د دغې ډلې تر کنټرول لاندې اقتصادي ثبات ترلاسه کړی او د نړیوال بانک وروستی راپور د افغانستان په اقتصاد کې ۲.۷ سلنه وده ښیي.
دا په داسې حال کې ده چې ټرمپ د خپلې دندې پر لومړۍ ورځ له افغانستان سره د امریکا مالي مرستې د ۹۰ ورځو لپاره وځنډولې.
په داسې حال کې چې په افغانستان کې میلیونونه وګړي بشري مرستو ته اړتیا لري، ځینو نړیوالو بنسټونو د ټرمپ دا پرېکړه وېرونکې بللې ده.
