۸صبح، دایکندي: د دایکندي سیمهییزې سرچینې وايي چې طالبانو د دغه ولایت په خدیر ولسوالۍ کې د انګلیسي ژبې یو ښوونیز مرکز تړلی او د دغه مرکز مدیر او درې ښوونکي یې نیولي دي.
سرچینو سهشنبه د مرغومې پر ۲۵مه، ۸صبح ورځپاڼې ویلي چې طالبانو د خدیر ولسوالۍ د کورګي سیمې په «پتابک» کلي کې د انګلیسي ژبې ښوونیز مرکز تړلی او د دغه مرکز مدیر او دوه ښوونکي یې له ځانه سره بیولي دي.
د سرچینو په وینا، طالبانو له دې ښوونیز مرکز څخه څلور ښځینه ښوونکې هم نیولې وې چې د قومي مشرانو د منځګړيتوب او ضمانت په ترڅ کې ازادې شوې دي.
طالبانو په دایکندي کې په دې تړاو څه ویلي نه دي.
د یادونې ده چې د روانې اوونۍ د یکشنبې ورځ طالبانو د دایکندي ولایت په سنګتخت او بندر ولسوالۍ کې د انګلیسي ژبې یو ښوونیز مرکز تړلی او د دغه مرکز درې ښوونکي نیولي دي.
د نیول شویو کسانو د برخلیک په اړه لا معلومات نشته.
طالبانو له تېرو درېیو کلونو راهیسې له شپږم ټولګي پورته د نجونو پرمخ د ټولو ښوونیزو مرکزونو دروازې تړلي دي.
دغې ډلې د بېلابېلو تورونو له امله د بهرنیو ژبو لسګونه مرکزونه هم تړلي دي.
