۸صبح، کونړ: د کونړ سیمهییزې سرچینې وایي چې طالبانو په دغه ولایت کې د نجونو دوه ښوونیز مرکزونه تر بلې خبرتیا پورې تړلي دي.
سرچینو یکشنبه د لړم پر ۲۰مه، ۸صبح ورځپاڼې ته وویل چې دا دوه ښوونیز مرکزونه د تېرې اوونۍ له چهارشنبې راهیسې په غازياباد ولسوالۍ کې تړل شوي دي.
د سرچينو د معلوماتو پر بنسټ، د دغو دوو ښوونيزو مرکزونو مالي ملاتړ د «ګېټز» مرستندويه ادارې له خوا کېده.
په دغو ښوونیزو مرکزونو کې له دولسم ټولګي فارغو نجونو ته عصري او دیني زدهکړې وړاندې کېدې.
طالبانو د دغو ښوونیزو مرکزونو مسوولانو ته خبرداری ورکړی چې که یې د دوی له اجازې پرته بېرته فعال کړي، له مجازاتو سره به مخ شي.
خو يوه بله سرچينه وايي چې طالبانو د دغو ښوونيزو مرکزونو د فعاليت په بدل کې د دغو مرکزونو له مسوولانو د پيسو غوښتنه کړې ده.
په کونړ کې د طالبانو مسوولانو تر اوسه په دې تړاو څه نه دي ویلي.
دغې ډلې پر افغانستان له واکمنېدو وروسته نجونې د زدهکړو له حقه بې برخې کړې دي.
له دې مخکې هم د هېواد په بېلابېلو سیمو کې د طالبانو له خوا د نجونو د ښوونیزو مرکزونو د تړل کېدو راپورونه ورکړل شوي وو.
