۸صبح، کابل: طالبانو ملګرو ملتونو ته د يو ليک په استولو سره سهيل شاهين خپل نوی استازی معرفي کړی او د ملګرو ملتونو په عمومي مجمع کې يې د طالبانو د بهرنيو چارو وزير اميرخان متقي د وينا غوښتنه کړې ده.
د رويترز خبري اژانس د راپور له مخې دغه ليک د روانې اوونۍ د دوشنبې پر ورځ، د ملګرو ملتونو عمومي منشي انتوني ګوتريش ته استول شوی دی. د طالبانو د بهرنيو چارو وزير اميرخان متقي دغه ليک لاسليک کړی دی.
د ګوتريش وياند فرحان حق دغه ليک تاييد کړی دی.
غلاممحمد اسحاقزی په ملګرو ملتونو کې د تېر حکومت دايمي استازي و. نوموړي تر دې وړاندې پر دغې څوکۍ د پاتېکېدا غوښتنه کړې وه.
د طالبانو په ليک کې راغلي، چې د اسحاقزي ماموريت پای ته رسېدلی او نوموړی له دې وروسته د افغانستان استازی نه دی.
ويل شوي دغه دوه غوښتنې د اعتبارنامې کمېټې ته چې نهه غړي لري، لېږل شوې دي. په دې کمېټه کې چين، امريکا او روسيه هم غړي دي.
رويټرز وايي، ګومان نه کوي دغه کميټه دې د ملګرو ملتونو د عمومي مجمع له پای ته رسېدا وړاندې ناسته جوړه کړي. په دې ډول کېدای شي، اميرخان متقي په عمومي مجمع کې وينا ونه کړي.
د اعتبارنامې کميټې تر غونډې مخکې به اسحاقزی پر خپله څوکۍ پاتې وي او کېدای شي، نوموړی د افغانستان په استازيتوب د ملګرو ملتونو په عمومي مجمع کې خبرې وکړي.
طالبانو د زمري پر څلورويشتمه کابل ونيوه او د وږي پر شپاړسمه يې د کابينې ځينې غړي اعلان کړل، خو تر اوسه په رسميت نه دي پېژندل شوی. ډېريو هېوادنو ويلي، د طالبانو په رسميت پېژندلو کې بیړه نه لري.