۸صبح، کابل: د طالبانو د بهرنیو چارو وزارت پر کندهار، پکتیا او خوست د پاکستاني پوځ د وروستیو بریدونو په غبرګون کې په کابل کې د پاکستان سفارت شارژدافیر احضار کړی دی.
نوموړي وزارت پنجشنبه د وږي پر ۲مه په خپرې کړې خبرپاڼې کې لیکلي چې قاطع اعتراض او احتجاج لیک یې د پاکستان سفارت شارژدافیر ته سپارلی او د دغه هېواد هوايي بریدونه یې په کلکو ټکو غندلي دي.
په خبرپاڼه کې راغلي چې بیګاه شپه د پاکستاني پوځ له خوا پر کندهار، پکتیا او خوست ولایتونو هوايي بریدونه شوي چې په پایله کې یو شمېر ملکي وګړو ته مرګ ژوبله اوښتې ده.
یاد وزارت ویلي چې دا ډول اقدامات د افغانستان د ملي حاکمیت او ځمکنۍ بشپړتیا ښکاره نقض او د اسلامي، نړیوالو، بشري او د ګاونډیتوب له اصولو سره په ټکر کې دي.
طالبانو هغه ادعاوې هم رد کړې چې د پاکستان د وروستیو امنیتي پېښو د توجیه لپاره د افغانستان خاوره د سرچینې په توګه مطرح کېږي.
نوموړي وزارت پر پاکستان تور لګولی چې دا ډول ادعاوو پر بنسټ د پوځي اقداماتو توجیه د واقعیتونو د تحریف، د عامه افکارو د مغشوشولو او د خپلو داخلي ناکامیو د پټولو هڅه ده.
