۸صبح، کابل: د پاکستان د پېښور ستری محکمې په لنډمهالي ډول د خیبر پښتونخوا ایالت د مرکز په دوو خصوصي روغتونونو کې د دندو ترسره کوونکو ۱۷ افغان ډاکترانو د نیول کېدو او ایستلو مخه نیولې ده.
پاکستاني رسنیو پنجشنبه د تلې پر ۲مه، راپور ورکړی چې دغې محکمې افغان ډاکترانو ته اجازه ورکړې چې په دغه ښار کې د خپلو ویزو د تمدید د غوښتنلیکونو تر پایلې خپلو تخصصي زدهکړو ته دوام ورکړي.
د راپور پر بنسټ، د پېښور ستری محکمې قضايي پلاوي د پاکستان فډرالي حکومت او د دغه هېواد د روغتیا او غاښونو د طب شورا (PMDC) ته خبرتیاوې استولي او د عملي زدهکړو ۱۷ افغان ډاکترانو د غوښتنلیکونو په اړه یې د ځواب غوښتنه کړې ده.
د عملی زده کړو دا ډاکتران په دوو خصوصي روغتونونو، «پېښور جنرل هسپتال» او «نورث وېسټ هسپتال اېنډ ریسرچ سنټر» کې د روغتیا په برخه کې تخصصي زدهکړې کوي.
دوی له محکمې غوښتي چې د پاکستان د روغتیا او غاښونو د طب شورا له لوري صادر شوی لارښود ناقانونه او له حقوقي پلوه بې ارزښته اعلان کړي.
همداراز یې له محکمې غوښتنه کړې چې د دغو دوو روغتونونو چارواکو ته لارښوونه وکړي، څو یې د فعالیت ځنډول لرې کړي او د تخصصي زدهکړو د دوام زمینه ورته برابره کړي.
د راپور پر بنسټ، غوښتنلیکووکو د خپلو ویزو د تمدید یا نوي کولو لپاره اړوندو چارواکو ته مراجعه کړې او پاسپورټونه، پخوانۍ ویزې، د CPSP اسناد، د روغتونونو د زدهکړو تصدیقپاڼې او نور اړین اسناد یې سپارلي دي؛ خو سره له دې چې اړین پړاوونه یې بشپړ کړي، د دغو ډاکترانو د ویزو د تمدید غوښتنلیکونه د نامنطقي مودې لپاره لا هم ځنډول شوي دي.
