۸صبح، کابل: سرچیني په پلازمېنه کابل کې د یوې ۲۰ کلنې نجلۍ د ځانوژنې خبر ورکوي.
سرچینو جمعه د لړم پر ۴مه ۸صبح ورځپاڼې ته منلې چې دا پېښه د درېیم مکروریانو په ګلستان ښارګوټي کې رامنځته شوې ده.
د سرچينو په وینا، دې نجلۍ ۲۰ کاله عمر لرلو او د يوې ودانۍ له لسم پوړ څخه يې ځان غورځولى دى.
تر اوسه د دې نجلۍ د ځانوژنې انګېزه نه ده څرګنده شوې.
طالبانو تر اوسه په دې تړاو څه نه دي ویلي.
پر هېواد د طالبانو له واکمنېدو وروسته د ښځو او نجونو ترمنځ د ځانوژنې کچه لوړه شوې ده.
د ملګرو ملتونو عالي کمېشنرۍ په یوه تازه راپور کې ویلي و چې د طالبانو نوي قانون ښځې او نجونې له شدید رواني فشار سره مخ کړي دي.
