۸صبح، کابل: د ملګرو ملتونو پراختیایي پروګرام (UNDP) اعلان کړی چې د ملګرو ملتونو د پانګونې له پراختیایي صندوق (UNCDF) سره کار کوي څو په افغانستان کې د کاروبارونو لپاره مالي سرچینو ته لاسرسی پراخ کړي.
دغه سازمان پنجشنبه د زمري پر لومړۍ په یوه راپور کې ویلي چې بریالي کاروبارونه کولای شي د هوساینې، ثبات او سولې په رامنځته کولو کې مهم رول ولوبوي.
د ملګرو ملتونو پراختیايي پروګرام زیاته کړې چې د کاروبارونو او د خلکو د اقتصاد ملاتړ په افغانستان کې د دغه بنسټ د فعالیتونو له مهمو برخو دی.
ويل کېږي چې د خصوصي سکټور پیاوړتیا، د سوداګرۍ او نوښت ملاتړ او د اقتصادي فرصتونو رامنځته کول د افغانستان د خلکو له مهمو اړتیاوو دي.
دغه همکاري په داسې حال کې کېږي چې افغانستان لا هم له اقتصادي ستونزو، د بېکارۍ له لوړې کچې او پراخې بېوزلۍ سره مخ دی او ډېر وګړي د ژوند د لومړنیو اړتیاوو په برابرولو کې له جدي ستونزو سره مخ دي.
