۸صبح، کابل: د ملګرو ملتونو د بشري استوګنې پروګرام (UN-Habitat) ویلي چې د کابل ښار د یو شمېر سړکونو د بیارغونې چارې یې پیل کړې څو اړینو خدماتو ته د سیمې د اوسېدونکو لاسرسی اسانه شي.
دغه بنسټ پنجشنبه د تلې پر ۲مه په اېکسپاڼه کې لیکلي چې د جاپان د نړیوالې همکارۍ ادارې (جایکا) په ملاتړ د کابل ښار د ۱۷مې ناحیې د سړکونو وضعیت د ښه کېدو په حال کې دی.
د ملګرو ملتونو د بشري استوګنې پروګرام ویلي چې د دغو سړکونو رغول کولی شي اړینو خدماتو ته د سیمې د اوسېدونکو لاسرسی لا اسانه او ډېر فرصتونه ورته برابر کړي.
دغه بنسټ زیاته کړې چې د سړکونو د بیارغونې پروژه په محرومو ښاري سیمو کې د ژوند د شرایطو د ښه کولو د هڅو یوه برخه ده.
د ملګرو ملتونو د بشري استوګنې پروګرام ویلي چې دا سړک له هغو ۲۱ سړکونو یو دی چې د بېوزلو سیمو د وضعیت د ښه کولو په موخه د جایکا په مالي ملاتړ او همکارۍ رغول کېږي.
