۸صبح، کابل: د روغتیا نړیوال سازمان ویلي چې د افغانستان په شمال کې یې له سېلاب ځپلو سره د اووه مټریکه ټنه درملو او روغتیايي توکو مرسته کړې ده.
روغتیا نړیوال سازمان یکشنبه د غويي پر ۲۳مه په یوې خپرې کړې خبرپاڼه کې لیکلي چې دا په افغانستان کې له ځپوونکو سېلابونو وروسته د دغه بنسټ د هڅو یوه برخه ده.
د نوموړي سازمان په خبره، دغو ویجاړوونکو سېلابونو ډېرې سیمې اغېزمنې کړې او ډېر وګړي یې وځپل.
په افغانستان کې د روغتیا نړیوال سازمان استازي ډاکتر جمشید تنولي ویلي: «موږ د قربانیانو کورنیو ته تسلیت وایو او له روغتیايي چارواکو او شریکانو سره په زیانمنو سیمو کې د اړینو روغتیايي چوپړونو وړاندې کولو لپاره یو ځای کېږو.»
نوموړي زیاته کړې چې د روغتیا نړیوال سازمان ژغورن ډلې په سېلاب ځپلو سیمو کې د خلکو د درد او رنځ کمولو په موخه پرلپسې هڅې کوي.
د روغتیا نړیوال سازمان ویلي چې د سېلابونو لامله د اوښتو تلفاتو وروستۍ شمېرې څرګندې نه دي او د دغه سازمان چارواکي له نورو روغتیايي بنسټونو سره د وضعیت پر ارزولو بوخت دي.
د خبرپاڼې په حواله، په سېلاب ځپلو سیمو کې د اسهال په څېر د اوبو له لارې د احتمالي ناروغیو د خپرېدو مخنیوي لپاره وقایوي تدابیر نیول شوي دي.
له دې وړاندې د خوړو نړیوال پروګرام په هېواد کې وروستیو سېلابونو ته په غبرګون کې ویلي چې په بغلان کې ډېرو سېلاب ځپلو سیمو ته موټر تللی نه شي.
د هېواد په څو ولایتونو کې وروستیو سېلابونو نړیوال مرستندویه سازمانونه اندېښمن کړي دي.
د ملګرو ملتونو د بشري مرستو د همغږۍ دفتر (اوچا) ویلي چې په افغانستان کې له سېلاب ځپلو سره د مرستو په حال کې دی چې پکې بېړني استوګنځایونه، روغتیايي او خوراکي توکي او نغدې پیسې دي.
