۸صبح، کابل: د افغانستان کرېکټ بورډ د افغان اتلانو او بنګلهدېش کرېکټ ملي لوبډلو ترمنځ د درې یو ورځنیو سیالیو نېټې په ډاګه کړې دي.
نوموړي بورډ یکشنبه د تلې پر ۸مه په یوه خبرپاڼه کې ویلي چې دا سیالۍ به د نوامبر میاشت پر ۶مه، ۹مه او ۱۱مه د افغانستان په کوربتوب په شارجه نړیوال کرېکټ لوبغالي کې ترسره شي.
د خبرپاڼې له مخې، د افغانستان کرېکټ بورډ دا لوبې د ۲۰۲۵م کال چمپینز ټرافي (د اتلانو جام) ته د هېواد ملي لوبډلې لپاره یو ښه چانس بللی او په وینا یې، د دغه جام تر رارسېدو به نورې سیالۍ هم برابرې کړي.
دغه راز د هېواد کرېکټ بورډ ویلي، افغان ملي لوبډله به د روان کال په ډېسمبر میاشت کې له زېمبابوې سره هم بشپړه لوبلړۍ (ټېست، نړیوالې یو ورځنۍ او ۲۰ اوره سیالۍ) ترسره کړي.
په خبرپاڼه کې راغلي، په پام کې وه چې افغان ملي اتلان په تېرو جولای او اګسټ میاشتو کې د یاد هېواد پر وړاندې درې یو ورځنۍ، درې ۲۰ اوره او دوه ټېسټ لوبې کړې وای، خو د ګرمې هوا له کبله وځنډېدې.
د دې لوبو له منځه اوسمهال یوازې د یو ورځنیو سیالیو لوبلړۍ چمپینز ټرافي ته د چمتووالي په موخه تنظیم شوې ده.
د یادونې ده چې افغان کرېکټ بورډ د ۲۰۲۵م کال په پیل کې د وېسټانډیز پر وړاندې هم د یو ورځنیو سیالیو لوبلړۍ ترسراوي په موخه خبرې اترې روانې کړې دي.
دا په داسې حال کې ده چې هېواد ملي اتلانو شاوخوا یوه اوونۍ وړاندې په شارجه کرېکټ لوبغالي کې سوېلي افریقا ته د یو ورځنیو لوبو په لوبلړۍ کې ماتې ورکړې وه.
