۸صبح، کابل: د ترکمنستان ولسمشر بردي محمدوف امر کړی چې په ۲۰۲۵ میلادي کال کې دې د تاپي پروژې چارې په چټکۍ مخته لاړې شي.
د «ترکمن پورتال» د راپور په حواله، ترکمنستاني ولسمشر شنبه د سلواغې پر ۲۰مه د دغه هېواد د تیلو او ګازو د تولید زیاتولو او په دې برخه کې یې د نوې تکنالوژۍ د کارولو پر اړتیا ټينګار کړی او زیاته کړې ده چې روان میلادي کال دې د دغه هېواد د انرژۍ پالیسۍ له مخې د تیلو او ګازو د تولید ظرفیت پراخ شي.
د تاپي د ګازو نللیکې پروژه چې په کال کې د ۳۳ میلیارد مترمکعبو ګازو د لېږد وړتیا او څه باندې ۱.۸ زره کیلومتره اوږدوالی لري، په ۲۰۱۵ کال کې له ترکمنستان څخه پیل شوه.
ټاکلې ده دا نللیکه د افغانستان له هرات او کندهاره او د پاکستان له کویټې او ملتان څخه تېره او د هند او پاکستان پولې فضیلکا ښارګوټي پورې وغځېږي.
له دې وړاندې «ترکمنګس» دولتي شرکت ویلي و چې په ترکمنستان کې د دې نللیکې ۲۱۴ کیلومتره بشپړه شوې او ګټې اخیستنې ته تیاره ده.
دغه راز، د افغانستان په خاوره کې د دغه پایپ لاین د جوړولو عملي چارې بیا د ۲۰۲۴ کال په ډسمبر کې پیل شوې دي.
