۸صبح، کابل: په کابل کې د روسیې سفارت د افغانستان په ختیځ کې د پاکستان په هوايي بریدونو کې د ملکیانو له مرګژوبلې اندېښنه څرګنده کړې ده.
نوموړي سفارت چهارشنبه د تلې پر لومړۍ په اېکس پاڼه کې د قربانیانو له کورنیو سره خواخوږي ښودلې او ټپیانو ته یې د روغتیا هیله کړې ده.
د روسیې سفارت له ښکېلو غاړو غوښتي چې له نښتو ډډه وکړي او اختلافات د خبرو له لارې حل کړي.
پاکستان وړمه ورځ د پکتیکا او کونړ پر ځینو سیمو هوايي بریدونه وکړل چې له کبله یې یو شمېر ملکیانو ته مرګ ژوبله اوښتې ده.
د طالبانو ویاند دا برید غندلی او هغه یې د جنګي جنایتونو تکرار بللی دی.
