۸صبح، کابل: د ملګرو ملتونو پراختیايي پروګرام (UNDP) ویلي چې د سویلي کوریا په مالي ملاتړ د ننګرهار په سوتان کلي کې د زلزلو پر وړاندې ۲۰۵ مقاومې ودانې جوړې شوې چې پکې د استوګنیزو کورونو په ګډون دوه روغتیايي مرکزونه هم شته.
نوموړي پروګرام چهارشنبه د تلې پر لومړۍ راپور ورکړی چې د دغو ودانیو ۲۰۳ یې د راستنېدونکو په ګډون زیانمنو کورنیو ته چې د وروستۍ زلزلې له کبله بېځایه شوې وې، ځانګړې شوې دي.
دا ودانۍ د «مالک له خوا د رغولو» تګلارې پر بنسټ رغول شوې دي.
د ملګرو ملتونو پراختیايي پروګرام د ودانیزو چارو په برخه کې تخنیکي مشورې، انجینري تخصص او ملاتړ برابر کړی او کورنیو هم په خپله خوښه د لګښتونو له ۱۰ تر ۵۰ سلنې پورې برخه ورکړې ده.
د راپور له مخې، دغو پروژو د ۱۸۸ ښځو په ګډون ۷۱۹ سیمهییزو کارګرو ته کاري زمینه برابره کړې ده.
دغه بنسټ زیاته کړې چې د اوبو د یوه اغېزمن شوي سرچینې له بیارغونې سره، د شاوخوا ۵۰۰ جریبه کرنیزې ځمکې د خړوبولو زمینه هم برابره شوې ده.
