۸صبح، کابل: د امریکا او طالبانو ترمنځ د بندیانو د ازادېدو پرسر د مذاکراتو په ترڅ کې رایان کوربت او ویلیم مککېنټي د دغې ډلې له زندانه ازاد او واشنګټن ته ستانه شوي دي.
سياېناېن راپور ورکړی چې دا تبادله د سهشنبه د سلواغې پر ۲مه په قطر کې شوې او دوه امریکایي بندیان د طالبانو غړي خان محمد په بدل کې ازاد شوي دي.
د طالبانو او امریکا ترمنځ د بندیانو تبادله د جو بایډن دولت پر وروستۍ ورځ شوې ده.
د راپورونو پر بنسټ، د دواړو خواوو ترمنځ د بندیانو تبادله د بایډن او ټرمپ د ملي امنیت سلاکارانو ترمنځ د همکارۍ په پایله کې شوې ده.
د بندیانو دا تبادله په دوحه کې له طالبانو سره د سپینې ماڼۍ او د امریکا د بهرنیو چارو وزارت د چارواکو د دوو کلونو مذاکراتو او لیدنو پایله وه.
طالبانو هم منلې چې د دغې ډلې غړي خان محمد په بدل کې دوه امریکایي بندیان ازاد شوي دي.
که څه هم طالبانو د خپل بندي د نیولو یا تورونو په تړاو څه نه دي ویلي، خو سياېناېن راپور ورکړی چې خان محمد دوه لسیزې دمخه په ننګرهار ولایت کې د ترهګرۍ او نشهيي توکو اړوند قضیو په تور نیول شوی او په کالیفورنیا کې پر عمري بند محکوم شوی و.
د یادونې ده چې امریکایي چارواکو له دې مخکې د طالبانو په بند کې د خپلو درېیو بندیانو د حضور خبره کړې وه، خو سياېناېن د جو بایډن د دفتر په حواله راپور ورکړی چې جورج ګلزمن او محمود حبیبي لا هم د طالبانو په بند کې دي.
دا په داسې حال کې ده چې طالبانو د افغان-امریکایي محمود حبیبي نیول رد کړي دي.
د امریکا او طالبانو ترمنځ د بندیانو تبادله د امریکا د نوي ولسمشر ډونالډ ټرمپ د لوړې مراسمو پر لومړۍ ورځ شوې ده.
رایان کوربت، جورج ګلزمن او محمود حبیبي په ۲۰۲۲ کې په کابل کې د طالبانو له خوا نیول شوي وو.
