۸صبح، کابل: طالبانو د امریکا له زندانه د خپلې ډلې د یو غړي له ازادېدو خبر ورکړی دی.
د طالبانو د بهرنیو چارو وزارت سهشنبه د سلواغې پر ۲مه په یو بیان کې زیاته کړې چې د دغې ډلې یو غړی «خان محمد» له امریکایي بندیانو سره تبادله او هېواد ته راستون شوی دی.
نوموړي وزارت ویلي چې «خان محمد» دوه لسیزې دمخه له ننګرهار ولایت څخه نیول شوی او د امریکا یوې محکمې پر عمري بند محکوم کړی و.
د طالبانو د بهرنیو چارو وزارت په بیان کې راغلي: «طالبان دا تبادله د خبرواترو له لارې د مسئلو د حل یوه ښه بېلګه بولي او په دې برخه کې د قطر ورور هېواد له مؤثر رول څخه ځانګړې مننه کوي.»
طالبانو زیاته ګړې چې «خان محمد» د امریکا په کالیفورنیا کې د خپل بند موده تېروله.
دغې ډلې وضاحت نه دی ورکړی چې «خان محمد» د کوم امریکایي بندي په بدل کې ازاد شوی دی.
د طالبانو د بهرنیو چارو وزارت ویلي چې دا ډله له افغانستان سره د اړیکو د عادي کولو لپاره د امریکا له اقداماتو هرکلی کوي.
دا په داسې حال کې ده چې درې امریکایي بندیان رایان کوربت، محمود حبیبي او جورج ګلزمن د طالبانو له خوا نیول شوي او بندیان وو.
طالبانو منلې وه چې د امریکایي بندیانو د ازادېدو لپاره په عادي ډول مذاکرات روانې دي، خو ادعا یې کړې وه چې د افغان الاصله امریکایي محمود حبیبي له برخلیکه بې خبره دي.
