۸صبح، کابل: د طالبانو تر کنټرول لاندې رسنیو د جوزجان په اقچې ولسوالۍ کې د غالۍ اوبدلو د دوو مرکزونو د پرانېستل کېدو خبر ورکړی دی.
باختر خبري اژانس پنجشنبه د زمري پر لومړۍ راپور ورکړی چې دا دوه مرکزونه د جوزجان د اقچې ولسوالۍ د مهاجرینو په ښارګوټي کې د ۲۵ میلیونو افغانیو په ارزښت پرانېستل شوي دي.
د راپور له مخې، دا مرکزونه د کډوالو په چارو کې د ملګرو ملتونو د عالي کمېشنرۍ (UNHCR) په مالي ملاتړ جوړ شوي دي.
په خبرپاڼه کې راغلي چې دا مرکزونه په درې زره او ۵۵۰ متره مربع ځمکه کې جوړ شوي او پر مډرنو تجهیزاتو، ماشینونو او امکاناتو سمبال دي.
همدارنګه ۵۵۰ راستنو شویو ته د کار زمینه هم برابره شوې ده.
