۸صبح، فاریاب: په فاریاب کې سیمهییزې سرچینې وايي چې په دغه ولایت کې د تېرو ۴۸ ساعتونو په لړ کې دوو ښځو او یوه نارینه ځانوژنه کړې ده.
په فاریاب کې سیمهییز طالب چارواکو یکشنبه د چنګاښ پر ۳مه ویلي چې د دغه ولایت په مرکز او پښتون کوټ ولسوالۍ کې یوې ښځې او یوه نارینه ځان وژنه کړې ده.
د سرچینو په وینا، د ځان وژنې لومړۍ پېښه پرون د فاریاب پښتون کوټ ولسوالۍ په «کته کلا» کلي کې شوې. په دې پېښه کې یوې ۳۳ کلنې ښځې ځان د خپل پلار په کور کې زندی کړی دی.
سرچینې وايي چې دغې ښځې واده کړی و او د ځان وژنې لامل یې رواني ناروغي یاده شوې ده.
ورته مهال، پرون شپه د فاریاب مرکز میمنې د لومړۍ حوزې په اوړند سیمه کې یو ځوان ځان وژلی دی.
د سرچینو د معلوماتو په حواله، دا ځوان عتیقالله نومېده او د ځان وژنې لامل یې «له یوې نجلۍ سره ټلیفوني اړیکه» ښودل شوې ده.
تر اوسه څرګنده نه ده چې دا اړیکه څنګه د دغه ځوان د ځان وژنې لامل شوی دی.
ویل شوي چې عتیقالله د کرنې پوهنځي محصل و او په میمنې ښار کې یې ترکاري پلورله.
بل پلو، پرون له غرمې وړاندې هم د دولت اباد ولسوالۍ په اړوند سیمه کې یوې ۲۶ کلنې ښځې ځان زندۍ کړی دی.
د دغې پېښې لامل بیا کورنی تاوتریخوالی ښودل شوی دی.
پر افغانستان د طالبانو له بیاواکمنېدو راوروسته د ځان وژنې پېښې ډېرې شوې دي.
په هېواد کې د ځان وژنې ډېرو پېښو لاملونه اقتصادي او رواني ستونزې او کورنی تاوتریخوالی ګڼل کېږي.
