۸صبح، کابل: د ملګرو ملتونو د خوړو او کرنې سازمان او د خوړو نړیوال پروګرام خبرداری ورکړی چې اټکل کېږي په را روان ژمي کې به په افغانستان کې ۱۹.۲ میلیونه کسان د خوړو له ناامنۍ سره مخ او په ۲۰۲۷ کال کې به د خوارځواکۍ کچه هم لوړه شي.
دغو سازمانونو پنجشنبه د تلې پر ۲۳مه د یوه راپور په خپرولو ویلي چې د افغانستان ۳۸ سلنه وګړي به د نوامبر او اپریل میاشتو ترمنځ د خوړو له سخت کمښت سره مخ شي.
د راپور پر بنسټ، دا شمېر د تېر کال د همدې مودې پرتله لوړ دی او په افغانستان کې به شاوخوا پنځه میلیونه کسان د لوږې له بېړني حالت سره مخ شي.
یادو بنسټونو خبرداری ورکړی چې د زیانمنونکو کورنیو د مړینې او د هغوی د ژوندانه سرچینو د له منځه تلو د مخنیوي لپاره، بېړنیو خوراکي مرستو او د کرنې په برخه کې بیړني ملاتړ ته اړتیا ده.
د راپور له مخې، بدخشان، بادغیس، دایکندي، غور، سمنګان او سرپل ولایتونه او د غزني کلیوالي سیمې به د خوړو له تر ټولو سخت کمښت سره مخ شي.
همداراز اټکل کېږي چې په افغانستان کې به په ۲۰۲۷ کال کې د خوارځواکۍ پېښې نږدې ۱۰ سلنه زیاتې شي او شمېر به یې څلورو میلیونو ته ورسېږي.
