۸صبح، کابل: د کډوالو په چارو کې د ملګرو ملتونو عالي کمېشنرۍ (UNHCR) وايي چې پناه غوښتونکو خپل کورونه په خپله خوښه نه دي پرېيښي، بلکې د امنیت موندلو په موخه له هر څه تېرېدو ته اړ شوي دي.
نوموړي سازمان پنجشنبه د زمري پر ۲۹مه په اېکس پاڼه کې لیکلي چې پناهغوښتونکي د خوندي ځای موندلو په موخه د خپل کور او ژوند د پرېښودو سخته پرېکړه کړې ده.
دغه بنسټ په داسې حال کې له کډوالو سره پر خواخوږي ټینګار کړی چې په بېلابېلو هېوادونو، په ځانګړې توګه ګاونډیو هېوادونو کې زرګونه افغان پناهغوښتونکي له اقامتي او اقتصادي ستونزو سره مخ دي.
په وروستیو میاشتو کې د سیمې یو شمېر هېوادونو د افغان کډوالو او پناهغوښتونکو د ایستلو بهیر چټک کړی دی.
ځينې افغانان چې له ایستل کېدو وروسته بېرته هېواد ته تللي، له اقتصادي ستونزو، د کاري بوختیاوو له نشتوالي او د ژوند د لومړنیو اړتیاوو د برابرولو له ستونزو سره مخ دي.
