۸صبح، کابل: د ملګرو ملتونو پراختیايي پروګرام (UNDP) ویلي چې د اروپايي ټولنې په ملاتړ د افغانستان په بدخشان ولایت کې د اقتصادي پیاوړتیا، د بنسټيزو خدماتو د ښه والي او د سیمهییزو ټولنو د ظرفیت لوړولو لپاره پراخ پروګرامونه پلي کوي.
نوموړي سازمان شنبه د چنګاښ پر ۱۳مه راپور ورکړی چې د اروپايي ټولنې یوه پلاوي بدخشان ته سفر کړی او په فیضاباد، بهارک او ارغنج خواه ولسوالیو کې یې له یو شمېر پراختیايي پروژو لیدنه کړې ده.
د راپور له مخې، په دغو پروژو کې د کوچنیو کاروبارونو پیاوړتیا، د زیانمنو کورنیو د معیشت ملاتړ، د خوړو خوندیتوب ښه والی، د کرنې پراختیا، د اوبو لګولو سیستمونو پراختیا او روغتیايي خدماتو لوړول دي.
ملګرو ملتونو زیاته کړې چې د دغو پروګرامونو یوه برخه د فني او مهارت زدهکړو پر مټ د ښځو او ځوانانو پر پیاوړتیا تمرکز لري څو له لارې یې په لرې پرتو سیمو کې د کارموندنې او دوامداره عاید لپاره لاره چاره برابره شي.
د راپور له مخې، دا پروژې د ملګرو ملتونو د پراختیایي پروګرام او په افغانستان کې د همکارو بنسټونو په ګډه همکارۍ عملي کېږي او موخه یې د اقتصادي، اقلیمي بحرانونو او د اساسي خدماتو د کمښت پر وړاندې د سیمهییزو ټولنو د زیان کچې کمول دي.
