۸صبح، کابل: د ملګرو ملتونو د بشري مېشتېدنې پروګرام (UN-Habitat) خبر ورکړی چې ښايي تر ۲۰۶۰ کال پورې د افغانستان له هرو دوو وګړو یو یې په ښار کې ژوند وکړي.
دغه بنسټ دوشنبه د تلې پر ۱۳مه، پر خپله ایکس پاڼه لیکلي چې د نړیوالې ښاري مېشتېدنې د ورځې نمانځل په ښارونو کې د شته فرصتونو او ننګونو یادول دي.
ملګرو ملتونو ویلي چې د افغانستان ښارونه په چټکۍ پراخېږي او په راتلونکو کلونو کې به په هېواد کې د ښاري کېدو بهیر هم دوام ومومي.
یاد بنسټ زیاته کړې چې د ښاري نفوس زیاتوالی به د افغانستان لپاره لوی بدلون رامنځته کړي او د مدیریت لپاره یې ډېرو اقداماتو او پانګونې ته اړتیا ده.
د ملګرو ملتونو د بشري مېشتېدنې پروګرام ټینګار کړی چې په ښارونو کې دې لا ډېره پانګونه وشي، څو ښاري کېدل د ټولګډونې ودې لپاره لار پرانېزي.
