۸صبح، کابل: د ملګرو ملتونو د بشري استوګنې پروګرام (UN-Habitat) وايي چې د جاپان د نړیوالو همکاریو اژانس (جایکا) په ملاتړ یې د کابل په ختیځ کې یو روغتیايي مرکز جوړ کړی دی.
نوموړي بنسټ چهارشنبه د زمري پر ۷مه راپور ورکړی چې دا له هغو ۲۱ روغتیايي مرکزونو یو دی چې په محرومو سیمو کې جوړېږي.
د راپور له مخې، د دغې پروژې موخه د روغتیايي مرکزونو د شرایط ښه کول او روغتیايي خدماتو ته د خلکو د لاسرسي پراخول دي.
د ملګرو ملتونو د بشري استوګنې پروګرام ټینګار کړی چې د باکیفیته روغتیايي خدماتو وړاندې کول یوازې له ډاکټرانو او درملو سره تړلي نه دی او په دې برخه کې روغتیايي زیربناوې هم بنسټیز رول لري.
دا په داسې حال کې ده چې د افغانستان روغتیايي سیسټم د ډاکټرانو، تجهیزاتو، درملو او بشردوستانه مرستو د کمښت له کبله له ګڼو ننګونو سره مخ دی.
