۸صبح، کابل: ملګري ملتونه وایي چې د قانوني محدودیتونو ترڅنګ ناامنیو، بېوزلۍ، بېځایه کېدو او چاودېدونکو توکو افغان ماشومانو ته ویجاړوونکې پایلې لرلې دي.
ملګرو ملتونو جمعه د تلې پر ۱۷مه د دغه بنسټ د سرمنشي انتونیو ګوتېرېش په راپور کې ویلي چې د طالبانو او پاکستان ترمنځ د کرښې په اوږدو کې نښتو هم پر ماشومانو منفي اغېز کړی دی.
د راپور له مخې، ملګرو ملتونو په افغانستان کې د ۲۰۲۳ او ۲۰۲۵ کلونو ترمنځ د ماشومانو له حقونو د جدي سرغړونو ۴ زره او ۵۸۲ پېښې تایید کړې دي.
دغه شمېر د راپور ورکولو د تېرې دورې پرتله ۳۸ سلنه کم شوی، خو ملګري ملتونه وایي چې د پېښو دا کموالی د ماشومانو حالت د پام وړ ښهوالي مانا نه لري.
په دې موده کې یو زرو ۴۱۵ ماشومان وژل شوي یا ټپیان شوي.
د ملګرو ملتونو په خبره، د ماشومانو ۸۰ سلنه مرګژوبله د چاودېدونکو توکو له امله رامنځته شوې ده.
د راپور له مخې، د ماشومانو له حقونو د سرغړونو تر ټولو ډېرې تایید شوې پېښې له طالبانو سره تړل شوې دي.
د ماشومانو او وسلهوالو شخړو په چارو کې د ملګرو ملتونو د سرمنشي ځانګړې استازې ونسا فریزر له ټولو ښکېلو لورو غوښتي چې د ماشومانو د خوندیتوب لپاره اقدامات او په استوګنیزو سیمو کې د چاودېدونکو وسلو له کارولو ډډه وکړي.
