۸صبح، کابل: د افغانستان لپاره د ملګرو ملتونو ځانګړي اماني صندوق (UN STFA) ویلي چې په ۲۰۲۵ کال کې یې د ۲ زره او ۶۵۶ افغان ښځو د کاروبارونو د پراختیا او عایداتي فعالیتونو د پیلولو ملاتړ کړی دی.
دغه بنسټ چهارشنبه د زمري پر ۷مه، پر خپله ایکس پاڼه کې لیکلي چې د دغه ملاتړ له لارې ښځو ته زمینه برابره شوې چې د روزنې، اړینو وسایلو او سرچینو په ترلاسه کولو سره خپل اقتصادي فعالیتونه پیاوړي کړي.
د دغه بنسټ د خبرپاڼې له مخې، د ملاتړو پروګرامونو له کبله یو شمېر ښځې توانېدلې چې خپل واړه کاروبارونه پیل یا پراخ کړي او له دې لارې ځانونو او کورنیو ته عاید برابر کړي.
د طالبانو له بيا واکمنېدو وروسته، په افغانستان کې ښځې د کار او اقتصادي فعالیتونو په برخه کې له پراخو محدودیتونو سره مخ شوې دي.
دا په داسې حال کې ده چې یو شمېر نړیوال بنسټونه د ښځو د وړو کاروبارونو او عایداتي فعالیتونو د ملاتړ له پروګرامونو سره مرسته کوي، څو له کورنیو سره د خپل ژوند د لګښتونو په برابرولو کې مرسته وشي.
