ملګري ملتونه وايي چې په نړۍ کې له هرو پنځو ماشومانو یو یې په شدیدې بېوزلۍ کې ژوند کوي، داسې وضعیت چې ان بډایه هېوادونه هم ترې د کورنیو د ملاتړ لپاره د پراخو لګښتونو سربېره، خوندي پاتې نه دي.
نوموړي بنسټ شنبه د اکتوبر پر ۱۷مه راپور ورکړی چې له ماشومانو سره د تاوتریخوالي پر ضد مبارزې چارو کې د ملګرو ملتونو ځانګړې استازې نجات معلا مجید د بېو له لوړېدو، خوراکي ناامنۍ او د ماشومانو پر ضد تاوتریخوالي له پراخېدو اندېښنه ښودلې ده.
معلا مجید ویلي چې په ځينو هېوادونو کې له بشري حقونو سره مخالفت زیات شوی او د ټيکنالوژۍ چټک پرمختګ په ځانګړې توګه د مصنوعي ځيرکتیا، د تازه فرصتونو ترڅنګ، ماشومانو ته جدي ګواښونه هم رامنځته کړې دي.
د هغې په خبره، په دغو ګواښونو کې له ماشومانو جنسي ناوړه ګټه اخیستنه، سایبري ځورونه، د مصنوعي ځیرکتیا په کارولو د انځورونو او ویډیوګانو جعل کول او په مجرمانه فعالیتونو کې د ماشومانو ښکېلول شامل دي.
معلا مجید د ماشومانو پر وړاندې د تاوتریخوالي په اړه د ملګرو ملتونو څېړنې ته په اشارې ویلي چې دا ستونزه په ټولو هېوادونو، له کور او ښوونځي نیولې تر ټولنې پورې شته.
