د ایران د بهرنیو چارو وزیر سیدعباس عراقچي ویلي چې پر ایران د امریکا او اسراییلو په بریدونو کې د سلګونو ښځو او ماشومانو په ګډون شاوخوا پنځه زره کسان وژل شوي دي.
تسنیم خبري اژانس شنبه د اکتوبر پر ۱۷مه راپور ورکړی چې عراقچي ویلي، امریکا او اسراییل له نړیوالو حقوقو سرغړونه کړې او د ایران جګپوړي سیاسي او نظامي چارواکي یې ووژل.
عراقچي زیاته کړې چې په میناب کې د څه باندې ۱۶۰ زدهکوونکو او ښوونکو وژل، د لامرد پر ورزشي لوبغالي د کلستر بمونو برید او په کوهستک سیریک کې د واده پر مراسمو برید، هغه پېښې دي چې نوموړي د ایران پر وړاندې جنګي جنایتونه بللي دي.
د ایران د بهرنیو چارو وزیر ویلي چې امریکا او اسراییل نه شي کولی دا پېښې د «حقیقت په سرچپه ښودلو او د قرباني او تېري کوونکي د ځایونو په بدلولو» پټې کړي.
عراقچي ټینګار کړی چې ایران به له خپلو خلکو، ملي حاکمیت او مشروع ګټو دفاع وکړي.
نوموړي ویلي، د ایران د حقونو دفاع د سولې له هڅو سره په ټکر کې نه دي او د جګړې له امله د اوښتو زیانونو تجربې د دغه هېواد لپاره د سولې ارزښت لا زیات کړی دی.
