۸صبح، کابل: د ملګرو ملتونو د وګړو صندوق (UNFPA) د نړۍ د نفوس د ورځې په مناسبت په خپل پیغام کې د افغان ځوانانو پر ملاتړ ټینګار کړی دی.
دغه بنسټ دوشنبه د چنګاښ پر ۲۲مه پر خپله اېکسپاڼه کې لیکلي، چې د افغانستان ۶۳ سلنه نفوس له ۲۴ کلونو کم عمر لرونکي کسان جوړوي.
د ملګرو ملتونو دې صندوق ویلي، ژمن دی چې د افغان ځوانانو ملاتړ د څو اړخیزو مرکزونو او د ځوانانو د روغتیا کرښې په څېر د هغو پروګرامونو له لارې وکړي، چې ځوانانو ته روغتیايي معلومات او د ژوند مهارتونه برابروي، څو له ستونزو سره د مقابلې وړتیا پیدا کړي.
په افغانستان کې د ملګرو ملتونو د وګړو صندوق د استازې مرستیالې لاتیکا ماسکي پرادان ویلي، د دې لپاره چې ځوانان خپل ټول ظرفیت ته ورسېږي، اړینه ده داسې چاپېریال برابر شي چې د هغوی له بېلابېلو هیلو او غوښتنو ملاتړ وکړي.
دا په داسې حال کې ده، چې په افغانستان کې ځوانان د کار د نشتوالي، د مناسبې زده کړې او لوړو زده کړو د نه لاسرسي او دغه راز د سختې بېوزلۍ له ستونزو سره مخ دي.
