۸صبح، کابل: په افغانستان کې د ملګرو ملتونو د مرستندوی پلاوي دفتر (یوناما) وايي، چې په درېیو میاشتو کې یې د طالبانو د محتسبانو له لوري د افغان ښځو او نارینهوو د خپلسرو نیونو ۴۴۳ پېښې او له هغوی سره د ناوړه چلند ۹۷ پېښې مستندې کړې دي.
یوناما پنجشنبه د د تلې پر ۲۳مه، په افغانستان کې د بشري حقونو د وضعیت په اړه په خپل تازه راپور کې ویلي، چې دغه نیونې تر ډېره د ښځو لپاره د حجاب د لارښوونو د سرغړونې او د نارینهوو د ږیرو د لنډولو یا په «لوېدیځ سبک» د وېښتانو د جوړولو په تور شوې دي.
د دغه بنسټ په وینا، موسیقۍ ته غوږ نیول او په جماعت لمانځه کې نه ګډون هم د دغو پېښو له نورو لاملونو دي.
د راپور له مخې، د طالبانو د امر بالمعروف او نهی عن المنکر قانون ۲۴مه ماده د هغو کسانو لپاره چې منکرات ترسره کوي، تر درېیو ورځو پورې د بند سزا ټاکي.
بلخوا، یوناما داسې پېښې هم مستندې کړې دي چې په هغو کې کسان د دغه قانون د سرغړونې په تور تر درېیو ورځو زیات په بند کې ساتل شوي دي.
یوناما زیاته کړې، چې په یوه مورد کې د اګست پر ۱۷مه، د پکتیکا ولایت د یوسفخېلو ولسوالۍ د علياباد بازار کې د طالبانو د امر بالمعروف او نهی عن المنکر ریاست دوه نايان د ږیرو د لنډولو او په «لوېدیځ سبک» د وېښتانو د جوړولو په تور يوه مياشت بنديان کړي دي.
همدا راز، د اګست پر ۲۱مه، د ننګرهار ولایت د روداتو ولسوالۍ د حصارشاهي بازار په سیمه کې د طالبانو د ادارې محتسبانو په جماعت لمانځه کې د دوکاندارانو د نه ګډون له امله شاوخوا ۱۰۰ دوکانونه تړلي دي.
