۸صبح، کابل: د ملګرو ملتونو ښوونیز، علمي او کلتوري سازمان (یونیسکو) ویلي چې افغانستان په نړۍ کې یوازینی هېواد دی چې نجونې او ښځې پکې له ابتدايي کچې پورته زدهکړو بې برخې او د اټکل له مخې ۲.۴ میلیونه نجونې له منځنیو زدهکړو محرومې دي.
نوموړي سازمان سهشنبه د زمري پر ۲۰مه په یوه خبري کنفرانس کې ویلي چې د طالبانو ښوونیزو محدودیتونو زدهکړو ته د لاسرسي په برخه کې د تېرو دوو لسیزو هڅې معکوسې کړې دي.
یونیسکو ویلي چې په ۲۰۰۱ کال کې زدهکړو ته د نجونو لاسرسی محدود و، خو تر ۲۰۲۱ کال پورې نږدې یو میلیون نجونې پر منځنیو زدهکړو بوختې وې.
د دغه بنسټ په خبره، له زدهکړو د نجونو او ښځو د محرومیت دوام د زدهکړو له بنسټيز حق سره په ټکر کې دی او دا ګواښ هم شته چې افغانستان به د لسیزو لپاره د بشري وړتیاوو له لاسه ورکولو، بېوزلۍ او نه جبرانېدونکو زیانونو سره مخ شي.
یونیسکو زیاته کړې، په داسې حال کې چې د افغانستان نږدې نیمايي وګړي د بېوزلۍ تر کرښې لاندې ژوند کوي، له زدهکړو د نجونو او ښځو محرومیت او پر کاري بوختیاوو محدودیتونه یې له خپلو کورنیو د ملاتړ او د هېواد په اقتصادي راتلونکي کې د ونډې اخیستلو وړتیا کمزورې کوي.
دغه سازمان خبرداری ورکړی چې له زدهکړو محرومیت د نجونو او ښځو پر رواني او فیزیکي روغتیا او هوساینې ناوړه اغېزې لري او د کمعمره ودونو ګواښ زیاتوي.
