۸صبح، کابل: د ملګرو ملتونو د ماشومانو د ملاتړ صندوق (یونیسف) ویلي، د مور شیدې ورکول، په ځانګړې توګه د ماشوم د ژوند په لومړیو میاشتو کې د ناروغیو په مخنیوي او د ماشومانو په سالمه وده کې مهم رول لري.
دغه بنسټ يکشنبه د زمري پر ۱۱مه، پر خپله اېکسپاڼه لیکلي چې د مور په شیدو د تغذیې د نړیوالې اوونۍ او د کال په نورو ټولو ورځو کې د میندو ترڅنګ ولاړ دی او د سالم راتلونکي لپاره د مور په شیدو د تغذیې ملاتړ کوي.
یونیسف زیاته کړې چې له زېږون وروسته په لومړي ساعت کې د مور د شيدو د ورکړې پيلول، تر شپږو میاشتو پورې یوازې د مور په شیدو د ماشوم تغذيه او تر دوو کلونو پورې د هغې دوام د ماشومانو د روغتیا په ښه والي کې مهم رول لري.
د دغه بنسټ په وینا، د مور شیدې د ځینو ناروغیو د خطر په کمولو، د ماشومانو د جسمي ودې په پیاوړتیا او د هغوی د مغزي ودې په ښه کېدو کې مرسته کوي.
یونیسف ټینګار کړی چې د میندو ملاتړ او د مور په شیدو د تغذیې دودول د ماشومانو د روغتیا د خوندي کولو او د راتلونکو نسلونو لپاره د سالم راتلونکي د جوړولو له مهمو ګامونو دي.
