۸صبح، کابل: د ملګرو ملتونو د ماشومانو د ملاتړ صندوق (یونیسف) ویلي چې د «مور او ماشوم د نغدي مرستو پروګرام» په افغانستان کې له زیانمنو کورنیو سره مرسته کوي.
نوموړي بنسټ دوشنبه د چنګاښ پر ۲۹مه په اېکس کې لیکلي چې دا پروګرام د ملګرو ملتونو د بشردوستانه مرستو د همغږۍ دفتر (OCHA) په ملاتړ روغتیايي او د تغذیې خدماتو ته د کورنیو له لاسرسي په ښه کولو کې مرسته کوي.
یونیسف ویلي چې د دغه پروګرام موخه له میندو او ماشومانو ملاتړ دی.
له دې مخکې هم د ملګرو ملتونو د ماشومانو د ملاتړ صندوق ویلي و چې په افغانستان کې د میندو او ماشومانو له روغتیا سره د مرستې په موخه امیندوارو میرمنو ته خوراکي مکملونه ورکوي.
دا په داسې حال کې ده چې د افغانستان د بېوزلۍ، د کاري بوختیاوو کمښت او روغتیايي خدماتو ته د خلکو د محدود لاسرسي په څېر ننګونو سره مخ دی.
