۸صبح، کابل: د ملګرو ملتونو د ماشومانو د ملاتړ صندوق (یونیسف) د لاسونو مینځلو د نړیوالې ورځې په مناسبت ویلي چې په ښوونځيو کې پاکو اوبو ته لاسرسی د ماشومانو له روغتیايي خوندیتوب سره مرسته کوي.
نوموړي بنسټ پنجشنبه د تلې پر ۲۳مه په اېکس پاڼه کې لیکلي چې په ښوونځيو کې د پاکو اوبو او صابون برابرول، ماشومان د ناپاکو اوبو له رامنځته کېدونکو ناروغیو ژغوري.
یونیسف په افغانستان کې د ماشومانو وضعیت ته په اشارې ویلي چې پاکو اوبو، د حفظ الصحې خدمات او روغتیايي اسانتیاوې د خلکو بنسټيزې اړتیاوې دي.
دغه سازمان زیاته کړې چې د افغانستان په ګوټ ګوټ کې پاکو اوبو او روغتیايي خدماتو ته د خلکو د لاسرسي په برخه کې هڅې کوي.
