۸صبح، کونړ: سیمهییزې سرچینې وايي چې د کونړ د سیند پر غاړه د یو ځوان سر پرې شوی جسد موندل شوی دی.
سرچینو یکشنبه د زمري پر ۱۸مه ۸صبح ورځپاڼې ته وویل چې دا ځوان عبدالباسط نومېده او د ننګرهار د کامې ولسوالۍ اصلي اوسېدونکی و.
د سرچینو په خبره، ناڅرګندو کسانو له هغه مبایل او زرنج غلا او وروسته یې سر ترې پرې کړی او مړی یې د کونړ سیند غورځولی دی.
هغوی وايي چې دا ځوان دوه ورځې مخکې له ننګرهاره کونړ ته د سیاحت لپاره راغلی و او مړی یې نن له غرمې وروسته موندل شوی دی.
دا په داسې حال کې ده چې طالبانو په وار وار ادعا کړې چې په هېواد کې سراسري امنیت ټينګ دی، خو د هېواد په ځينو برخو کې د ناامنیو، وسلهوالو غلاوو، هدفي او مرموزو وژنو پېښې زیاتې شوې دي.
له دې وړاندې په بادغیس کې ځايي سرچینو خبر ورکړی و چې ناڅرګندو کسانو د دغه ولایت په جوند ولسوالۍ کې له یو کس څخه په خپل کور کې سر پرې کړی دی.
