۸صبح، کابل: د ملګرو ملتونو په یوه تازه راپور کې راغلي چې د طالبانو مخالفو جبهو د مې او جولای میاشتو ترمنځ د افغانستان په ۲۱ ولایتونو کې د ۸۸ بریدونو مسوولیت منلی دی.
ملګرو ملتونو په دغه راپور کې ویلي چې له دغو بریدونو یې ۵۵ پېښې تایېد کړي او د طالبانو د مخالفانو د بریدونو شمېر په جولای کې ۳۰ مواردو ته رسېدلی دی.
د راپور له مخې، د افغانستان د آزادۍ جبهې، د ملي مقاومت جبهې، شنې قطعې، د سپاه میهن جبهې، د افغانستان د خپلواکۍ جبهې، د جمهوریت جبهې، د افغانستان متحدې جبهې، د اندراب مقاومت جبهې، د آزادۍ او عدالت نهضت، د افغانستان د خلکو اسلامي آزادۍ جبهې، د افغانستان د خلکو اسلامي آزادۍ بښونکي نهضت او د ملي بسیج جبهې د دغو بریدونو مسوولیت منلی دی.
د راپور په یوه برخه کې راغلي چې په دې موده کې د طالبانو مخالفې وسلهوالې ډلې لا ډېرې خورې ورې او غیرمتمرکزې شوې او فعالیتونه یې تر ډېره پر سیمهیېزه سیمو ورټول دي.
دغه بریدونه تر ډېره د طالبانو پر ځواکونو ، پوستو او پوځي تاسیساتو د کمینونو او بریدونو په بڼه و.
د سپاهی میهن جبهې د جولای پر ۱۷مه د بدخشان د یفتل پایین ولسوالۍ یو شمېر اداري ودانۍ د لنډ وخت لپاره ونیولې او وروسته یې له دغو ودانیو شاتګ وکړ.
همداراز، د افغانستان د آزادۍ جبهې د جولای پر ۲۴مه د بدخشان د زیباک ولسوالۍ په یوه سیمه کې د طالبانو پر امنیتي پوسته برید وکړ.
د طالبانو د امر بالمعروف او نهی عن المنکر وزارت ځواکونه هم د جون پر ۱۲مه په هرات او د جون پر ۲۲مه په کابل کې تر برید لاندې راغلې دي.
