۸صبح، خوست: د خوست سیمهییزې سرچينې وايي چې ناڅرګندو وسلهوالو په دغه ولايت کې يو مخکېنی سرتېری په ډزو وژلی دی.
سرچینو ۸صبح ورځپاڼې ته منلې چې دا پېښه جمعه د لړم پر ۴مه د خوست اسماعیلخېلو او مندوزیو ولسوالۍ اړوند په «حسنزیو» کلي شوې ده.
د سرچینو د معلوماتو پر بنسټ، دا سرتېری عبدالقادر خان نومېده او د مخکېني دولت د خوست په امنیه قومندانۍ کې یې کار کړی و.
د سرچينو په وینا، هغه تر دې مخکې له يوې کورنۍ سره ٦٠ کلنه دښمني لرله، خو په دې وروستيو کې د دواړو کورنيو ترمنځ سوله شوې وه.
د سرچينو د معلوماتو له مخې، د عبدالقادر خان کورنۍ وايي چې له هیچا سره يې شخصي دښمني نه لرله.
په خوست کې طالبانو تر اوسه په دې تړاو څه نه دي ویلي.
پر افغانستان د طالبانو له واکمنېدو وروسته دغې ډلې ګڼ شمېر پخواني سرتېري نیولي، شکنجه کړي او په ځینو مواردو کې یې ان وژلي دي.
