۸صبح، کاپسا: په کاپيسا کې سیمهییزې سرچينې د دغه ولايت په هوايي حريم کې د يوې بېپيلوټه الوتکې د ګزمې خبر ورکوي.
سرچینې ۸صبح ورځپاڼې ته منلې چې دا الوتکه سېشنبه د غويي پر ۴مه د غرمې له ۱:۵۰ راپدېخوا په دغه ولایت کې ګزمې کوي.
د سرچينې د معلوماتو پر بنسټ، دا الوتکه د مرکز ترڅنګ د دغه ولايت د کوهستان د لومړۍ او دويمې حصې ولسوالیو په فضا کې هم لیدل شوې ده.
تر اوسه نه ده څرګنده چې دا الوتکه له کوم هېواده د افغانستان هوايي حریم ته دننه شوې ده.
د تېر کال د لیندۍ په میاشت کې هم یوې بېپیلوټه الوتکې څو ساعته د کاپیسا په اسمان کې ګزمه کړې وه.
په دې وروستیو کې نیمروز، کندهار، پکتیکا، پنجشېر، هرات او بدخشان ولایتونه د بېپیلوټه الوتکو د ګزمې شاهدان دي.
څه موده وړاندې د طالبانو وياند ذبيحالله مجاهد د نيمروز او کندهار په فضا کې د بېپيلوټه الوتکو ګزمې منلې وې.
د طالبانو غایب مشر ملا هیبتالله اخوندزاده د وري پر ۱۴مه په کندهار کې د بېپيلوټه الوتکو د ګزمو د وېرې له کبله د ۲۰۵ قول اردو اړوند کمپ ته لېږدول شوی و.