هلمند کې بې وخته بارانونو او نباتي ناروغیو د پنبې د کروندګرو خوارۍ په سیند لاهو کړې

د هلمند سیمه ییز مسوولان وایې که څه هم دغه ولایت کې د تېر کال په پرتله د پنبې کرکیله زیاته شوې،خو په وینا یې، بې وخته بارانونو او وچکالۍ دپنبې پر سږنيو حاصلاتو منفي اغېز کړی دی.

په ورته وخت کې د دغه ولایت کروندګر که څه هم، د کال تردې مهاله دپنبې د ښې بیې خبره کوي، خو د پنبې د سږنيو حاصلاتو کمېدو اندېښمن کړي چې د دوی په باور ښایې پر خپلو کروندو کړي لګښتونه یې ور پوره نه کړي.

له څه مودې راهیسي چې افغانستان کي د طالبانو د مشر د یوه ځانګړي فرمان پر بنسټ، د کوکنارو پر کرکېله بندیز اعلان شو، هلمند کې هم د دې زهرجن بوټي کرکیله صفر ته راټيټه او ځای یې نورو کرنیزو کښتونو نیولى دی.

هلمندي کروند ګر وایې، سږکال د کوکنارو د نه کرل کېدو له امله د دغه ولایت پر پراخو کرنیزو ځمکو پنبه کرل شوې ده.

دلښکرګاه ښار د کاریزي سیمي اوسیدونکى محمد حسین وایې، سره له دې چې د کال تر دې مهاله، پنبه ښه بیه او بازار لري خو د کرنیزو توکو د لوړې بیې، وچ کالۍ او په کروندو د ورګډو شویو سږنیو نباتي ناروغیو له امله، ښایې سږکال په خپلو کروندو شوي لګښتونه هم پوره نه کړای شي.

همدا راز د مارجې ولسوالۍ یوبل اوسیدونکی محمد جمعه هم وایې:« که څه هم سږکال د پنبې کرکېله زیاته وه،خو وچکالۍ او نباتي ناروغیو پرحاصلاتو خورا منفي اغېز کړی او ډیریې کم کړي دي.»

دهلمند د کرني او مالدارۍ ریاست دترویج مدیر قاري محمد نسیم مسلم هم، سږکال په دغه ولایت کې د پنبې دپراخي کرکیلي پخلی کوي خو وایې، بې وخته ورښتونو، وچکالۍ او یو لړ نباتي ناروغۍ د دې لامل شوې چې کروندګر د پنبې کم حاصلات ترلاسه کړي.

بل خوا دهلمند دسوداګرۍ خوني رئیس غلام یحی پښتون وایې، د بُست دولتي فابریکې په دغه ولایت کې دمګړی ۳۵ دپنبې فابریکې فعالې دي.

دی وایي:« که چیري دغه ټولي فابریکې دهلمند سږنۍ پنبه پروسس کړي نو په دې توګه به درېیو ولایتونو ته د پندانې غوړي، اتو ولایتونو ته کُنجاره او لسو ولایتونو ته صابون صادر کړای شو.»

هلمندي کروندګر په داسي حال کې سږکال د بې وخته بارانونو او دغه راز نباتي ناروغیو له کبله د وراوښتو زیانونو خبره کوي، چي دهېواد په ګڼو نورو ولایتونو کې هم بې وخته بارانونو او نباتي ناروغیو کروندګرو او بڼوالو ته سخت زیانونه اړولي دي.

ورته لیکنې

Back to top button