۸صبح، کابل: طالبانو ویلي چې ازبکستانی پلاوی د افغانستان ځينو شمالي او شمالختیځو ولایتونو ته سفر کړی او د دغو ولایتونو د ځينو تاریخي ودانیو د بیارغونې او ترمیم خبر یې ورکړی دی.
د طالبانو د اطلاعاتو او کلتور وزارت یکشنبه د تلې پر ۱۹مه په خپرې کړې اعلامیې کې ویلي چې د ازبکستان د کلتوري میراثونو بنسټ مرستیال عزیزجان عارف جانوف په مشرۍ د دغه هېواد پلاوی افغانستان ته راغلی دی.
د اعلامیې له مخې، ازبکستاني پلاوي تخار ته د سفر په ترڅ کې د «مشرب بابا» تاریخي ابدې د بیارغونې او ترمیم ژمنه کړې ده.
دغه پلاوي ویلي چې د تخار د اشکمش ولسوالۍ د «مشرب بابا» د تاریخي ټولګې د بیارغونې په طرحه کې د قربانۍ ځای، عامه کتابتون، جومات، زرغونه ساحه، د موټرو تمځای او نورې اړینې اسانتیاوې په پام کې نیول شوې دي.
د سرپل ولایت او د فاریاب په اندخوی ولسوالۍ کې ځايي سرچینې هم وايي چې ازبکستاني پلاوي دغو سیمو ته د سفر پر مهال له تاریخي ودانیو لیدنه کړې او د د بیارغونې او ترمیم په برخه کې یې د همکارۍ ژمنه کړې ده.
