۸صبح، کابل: د خوړو نړیوال پروګرام (WFP) د ملګرو ملتونو د عمومي غونډې له ترسره کېدو سره هممهاله ویلي چې د افغانستان بحران دې هېر نه شي او د هغو کورنیو وضعیت چې له لوږې او خوارځواکۍ سره مخ دي، پاملرنې ته اړتیا لري.
نوموړي بنسټ پنجشنبه د تلې پر ۲مه په اېکس پاڼه کې لیکلي چې افغان مېندې د مرستې لپاره پر خوارځواکۍ خپل اخته ماشومان د تغذیې کلینیکونو ته وړي.
د خوړو نړیوال پروګرام زیاته کړې چې لا هم د افغانستان په ګوټ ګوټ کې لوږه او خوارځواکي کورنۍ ګواښي او میندې په دغو شرایطو کې له سختو غوراویو سره مخ دي.
دغه بنسټ پر خوارځواکۍ د اخته ماشومانو وضعیت ته په اشارې ټينګار کړی چې په افغانستان کې د زیانمنو کورنیو اړتیاوو ته پاملرنه دې د ملګرو ملتونو د عمومي غونډې پر مهال د پاملرنې وړ وګرځي.
