۸صبح، کابل: د روغتیا نړیوال سازمان (WHO) ویلي چې د ماشوم له زېږېدو وروسته په لومړي ساعت کې د مور شیدې د ناروغیو پر وړاندې د نویو زېږېدلو ماشومانو په خوندیتوب کې مهمه ونډه لري.
نوموړي بنسټ دوشنبه د زمري پر ۱۲مه ویلي له زېږون وروسته لومړنی ساعت د ماشوم په ژوند کې یو مهم پړاو دی او په راتلونکو کلونو کې د هغه پر روغتیا پام وړ اغېز کولی شي.
د روغتیا نړیوال سازمان زیاته کړې چې د مور شیدو ژر پیلول، په ځانګړې توګه د هغو ماشومانو لپاره چې له وخته مخکې زېږېدلې وي، پر انتانونو د اخته کېدو ګواښ کموي.
یاد سازمان ټینګار کړی چې د زېږون په لومړیو ساعتونو کې د شیدو ورکولو د پیل لپاره له میندو ملاتړ، د روغتیايي ګواښونو د کمولو او د ماشومانو د روغتیا د ښه والي لپاره اغېزمن ګام دی.
دا په داسې حال کې ده چې په افغانستان کې ځينې امیندواره او شیدې ورکوونکې ښځې پر خوارځواکۍ اخته دي.
په ځینو سیمو کې روغتیايي مرکزونو او د مشورو خدماتو ته محدود لاسرسی د دې لامل شوی چې ډېری میندې ونه شي کړای د شیدو ورکولو د پیل او دوام په اړه اړینې لارښوونې ترلاسه کړي.
