له افغان ځواکونو سره د امریکا مالي مرسته ۳.۳ میلیارد ډالرو ته لوړه شوه

د امریکا ولسمشر جو بایډن له افغان امنیتي او دفاعي ځواکونو سره ۳.۳ میلیاده ډالره مالي مرسته په پام کې نیولې ده، دغه طرحه د بایډن د دولت له خوا د ۲۰۲۲ کال له وړاندیزي بودیجې سره یو ځای ددغه هېواد کانګرس ته لېږل شوې ده.
د جو بایډن له خوا د بودیجې وړاندیزي طرحه د غبرګولي په اوومه نېټه ددغه هېواد کانګرس ته وړاندې شوه.
د یادولو وړ ده، چی د بایډن په وړاندیزي طرحه کې د تېر کال په پرتله د افغانستان له امنیتي ځواکونو سره په مالي مرستو کې ۹.۲ سلنه زیاتوالی راغلی دی.
افغان دولت له دغه اقدامه هرکلی کړی دی، د ملي امنیت شورا ویاند، رحمت الله اندړ وايي چې افغان دولت له امنیتي ځواکونو سره په مرسته شوې بودیجه کې له زیاتوالي هرکلی کوي.
د بایډن د وړاندیزي طرحې له مخې، د کانګرس له خوا د تایید په صورت کې به د امریکا په بودیجه کې د افغانستان له امنیتي ځواکونو سره ۳.۳ میلیارد ډالرو مرسته ځانګړې شي او دغه پیسې به د هېواد د اردو او پولیسو د تمویل، تجهیز او ظرفیت په لوړولو کې ولګول شي.
له افغان امنیتي ځواکونو سره د مرستې کچې د زیاتوالي موخه له ترهګرۍ سره د مبارزې په ډګر کې د دغو ځواکونو د پرمختګ او ظرفیت لوړول بلل شوي دي.
دا پرېکړه له افغانستانه د بهرنیو ځواکونو د وتلو په بهیر کې له افغان امنیتي ځواکونو د ملاتړ مهم پیغام له ځان سره لري.
د یادولو وړ ده، چی د افغانستان د پوځي ځواک د لوړولو په موخه د امریکا کانګرس ته د سپینې ماڼۍ په وړاندیزي طرحه کې ۷۱۵ میلیارد ډالره مرسته په پام کې نیول شوې ده.