په فرانسه کې د لاریونونو یوې تنظیموونکې ټولنې (سيجيټي) اعلان کړی چې د دغه هېواد په لاریونونو کې شاوخوا ۸۰۰ زرو کسانو ګډون کړی چې له ډلې یې ۲۵۰ زره په پاریس کې راټول شوي و.
فرانسې خبري اژانس شنبه د اکتوبر پر ۲۴مه راپور ورکړی چې دا لاریونونه داسې مهال ترسره شوي چې په فرانسه کې د ژوند د لګښتونو د زیاتوالي له امله د خلکو غوسه په زیاتېدو ده.
ورته مهال د فرانسې د کورنیو چارو وزارت په هېواد کې د لاریونوالو شمېر ۴۱۰ زره ښودلی چې له ډلې یې ۱۱۰ زره کسان په پاریس کې و.
له پاریس، لیون، لیل، مارسي، مونپلیه، نانت او تولوز ښارونو څخه د لاریونونو پر مهال نښتې هم راپور شوې دي.
د پاریس پولیسو ویلي چې د لاریونونو پر مهال یې څه باندې درې زره کسان درولي او تلاشي کړي او ۶۵ کسان یې نیولي دي.
په مارسی ښار کې لاریون له تاوتریخوالي پرته پای ته رسېدلی او پولیسو د لاریونوالو شمېر ۱۷ زره ښودلی، خو اتحادیو دا شمېر ۱۰۰ زره اعلان کړی دی.
فرانسې خبري اژانس راپور ورکړی چې پولیسو په لیون، لیل، مونپلیه، نانت او تولوز ښارونو کې د ښارونو مرکزونو ته د لاریونوالو له ننوتو د مخنیوي لپاره اوښکې بهوونکي ګاز کارولي.
