اندونیزیايي چارواکي وايي چې د دغه هېواد په سولاوسي ټاپو کې د ځمکې ښوېيدنې پېښې لږ تر لږه ۱۲ کسان مړه او ۱۸ نور ټپيان کړي.
رویټرز خبري اژانس د اندونیزیايي چارواکو په حواله راپور ورکړی چې دا پېښه یکشنبه د جولای پر ۸مه سهار مهال د سرو زرو یو ناقانونه کان ته څېرمه شوې ده.
په اندونیزیا کې د ژغورنې ادارې یوه چارواکي ویلي چې په پېښه کې د ورکو شویو کسانو د موندلو لپاره د دغې ادارې ۱۶۴ کارکوونکي، پولیس او پوځيان ګومارل شوي دي.
نوموړي زیاته کړې چې باید د پېښې تر ځایه ۲۰ کیلومتره مزل وکړي او په خبره یې، په سیمه کې د ورښت دوام او پر سړکونو پرتو خټو یې چارې ځنډنۍ کړې دي.
بل پلو، د اندونیزیا طبیعي پېښو پر وړاندې د مبارزې ادارې (BNPB) ویلي چې د ځمکې ښویېدو دې پېښې څو کورونه او یو پُل زیانمن کړی دی.
د یادونې ده چې د روان کال په مې میاشت کې د اندونیزیا په لویدیځ سوماترا ولایت کې د سختو بارانونو، سېلابونو او خټو ښوېیدو له امله څه باندې ۵۰ کسان مړه شوي وو.
